2020 წლის 31 ოქტომბრის აჭარის ავტონომიური რესპუბლიკის უმაღლესი საბჭოს არჩევნებისათვის უმაღლეს საარჩევნო კომისიაში პარტიული სიების წარდგენის ვადა 1 ოქტომბერს, 18:00 საათზე ამოიწურა.
პარტიული სიების წარდგენის შემდეგ იწყება პარტიული სიების შემოწმების პროცესი. წარმოდგენილ დოკუმენტაციას შესაბამისი სამსახური შეამოწმებს და უსკოს თავმჯდომარეს წარუდგენს დასკვნას არაუგვიანეს 5 ოქტომბრისა. თუ პარტიული სია შეესაბამება კანონმდებლობას, უსკოს თავმჯდომარე არაუგვიანეს 6 ოქტომბრისა გაატარებს სიას რეგისტრაციაში, ხოლო ხარვეზის დადგენის შემთხევაში, საარჩევნო სუბიექტს მიეცემა კანონით დადგენილი 3-დღიანი ვადა ხარვეზის გამოსასწორებლად.
ბოლო მონაცემებით, 31 ოქტომბრის არჩევნებისთვის რეგისტრირებული 25 საარჩევნო სუბიექტიდან, პარტიული სია უსკოს თავმჯდომარეს წარუდგინა 22-მა. უმაღლეს საარჩევნო კომისიაში რეგისტრირებულ იმ პარტიებს, რომლებმაც არ წარმოადგინეს პარტიული სიები, თავმჯდომარის განკარგულებით გაუუქმდებათ რეგისტრაცია.
პარტიული სია საარჩევნო რეგისტრაციაში ტარდება უსკოს თავმჯდომარის განკარგულებით, ხოლო საარჩევნო ოლქში წარდგენილი მაჟორიტარი კანდიდატის - შესაბამისი საოლქო საარჩევნო კომისიის თავმჯდომარის განკარგულებით.
პარტიულ სიებთან დაკავშირებული პროცედურები საბოლოოდ 11 ოქტომბერს დასრულდება.